पुणे : लेखक, विडंबनकार, नाटककार, झुंजार पत्रकार, घणाघाती वक्ते, शिक्षणतज्ज्ञ, उत्तम चित्रपट कथाकार, निर्भीड राजकारणी आणि जागरूक समाजसुधारक असे विविध पैलू लाभलेले आचार्य अत्रे म्हणजे महाराष्ट्राला लाभलेले एक असामान्य, उत्तुंग व्यक्तिमत्त्व! आचार्य अत्रे यांच्या जयंतीच्या निमित्ताने पुणे श्रमिक पत्रकार संघाच्या वतीने आचार्य अत्रे साहित्य दर्शन हे प्रदर्शन भरविण्यात आले होते. याचे उद्घाटन आचार्य अत्रे यांच्या ‘श्यामची आई’ या गाजलेल्या चित्रपटात श्यामची भूमिका करणारे कलाकार माधव वझे यांच्या हस्ते झाले.
सुहास बोकील यांनी या प्रदर्शनातील साहित्याचा संग्रह केला आहे. १३ आणि १४ ऑगस्ट असे दोन दिवस सुरू असलेल्या या प्रदर्शनात अत्रे यांच्या हस्ताक्षरातील लेख, संहिता, तसेच १९६० च्या दशकात प्रकाशित झालेले वृत्तपत्रांचे काही दुर्मीळ अंक, अत्रे यांच्या निधनानंतर प्रकाशित करण्यात आलेला ‘मराठा’चा विशेषांक आणि पु. ल. देशपांडे व इतर मान्यवरांनी अत्रे यांना वाहिलेली श्रद्धांजली आदी साहित्य ठेवण्यात आले होते. मोठ्या संख्येने साहित्यप्रेमींनी हे प्रदर्शन पाहण्यासाठी हजेरी लावली होती.
(या प्रदर्शनाची झलक दाखविणारा व्हिडिओ सोबत देत आहोत.)